No marco do ciclo Outono das Artes, promovido pola Deputación da Coruña, o Concello de Valdoviño invitou aos estudantes da ESO do CPI Atios a presenciar o visionado do documental “Crónicas dun NON!”. A proxección tivo lugar onte pola mañá no auditorio municipal.
A cinta, producida por Taller de Insomnios e Serea Films, conta coa presenza do seu director, Fernando Rodríguez Gómez, coñecido como “Peñaño”. O filme recupera a historia do movemento de insubmisión en Galicia e a loita colectiva que contribuíu á desaparición do servizo militar obrigatorio no Estado español.
A través da experiencia persoal do director e dos testemuños de participantes na mobilización, o documental percorre máis dunha década de desobediencia civil, compromiso social e defensa dos dereitos e liberdades. Máis alá da memoria dun movemento, a obra propón unha reflexión sobre o valor da participación cidadá e a capacidade da acción colectiva para impulsar cambios sociais e políticos.
