A alcaldesa de Narón, Marián Ferreiro, xunto co xefe de servizos básicos e mantemento do Concello, recolleu este mércores no Pazo de Santa Cruz de Ribadulla, en Vedra, a Bandeira Verde de Galicia. Este distintivo, concedido pola Xunta, recoñece as boas prácticas ambientais dos concellos, e Narón obtívoo por segundo ano consecutivo.
A conselleira de Medio Ambiente e Cambio Climático, Ángeles Vázquez, foi a encargada de entregar o selo a 39 concellos. Ferreiro destacou que a bandeira "é froito do traballo de moita xente e de proxectos que a veciñanza de Narón nota no seu día a día", engadindo que "para quen nos visita, ver a Bandeira Verde dá unha idea clara do que somos, un concello que coida da súa contorna e que nos obriga a seguir neste camiño".
A candidatura de Narón centrouse na senda peonil e ciclista do río Freixeiro, de 2,2 quilómetros, así como na pacificación do tráfico e a eliminación de barreiras arquitectónicas na contorna do CEIP Piñeiros e na Praza do Concello de Xuvia. Tamén se destacou a xestión de biorresiduos, con 52 puntos de achega, e programas de compostaxe doméstica.
A memoria presentada tamén incluíu o mantemento de máis de 400.000 metros cadrados de zonas verdes, a posta en valor da Ruta dos Muíños e do Centro de Interpretación dos Muíños Industriais de Xuvia (CIMIX). Ademais, mencionáronse a mellora da rede de abastecemento de auga, a extensión do alumeado LED e os obradoiros de educación ambiental nos colexios.
A Bandeira Verde de Galicia, creada en 2020, busca distinguir os concellos que desenvolven boas prácticas para o coidado da contorna, o respecto á paisaxe e a redución de emisións e consumo enerxético.
