A proposta, impulsada polas concellarías de Promoción Económica e Política Lingüística, forma parte do programa "Narón gaña co galego". Busca ofrecer ao comercio local formación, recursos e asesoramento lingüístico para traballar na lingua propia de Galicia.
Os negocios que se sumen á iniciativa deberán cumprir dous retos entre o 25 de outubro, Día Internacional do Comercio Local, e o 11 de novembro, Día Mundial das Compras. O primeiro consiste en atender á clientela en galego, usándoo como lingua de contacto inicial mentres a persoa non indique o contrario. O segundo reto é publicar contidos en galego nas redes sociais do negocio, co apoio do Servizo de Normalización Lingüística para revisar textos e resolver dúbidas.
Os comercios que completen os retos poderán participar nun vídeo publicitario que dará a coñecer a súa actividade e as vantaxes de usar o galego, co fin de animar a mercar no tecido comercial do municipio. Tamén terán acceso a un curso sobre fundamentos de márketing e comunicación titulado "O idioma como elemento diferenciador", impartido por Xosé Luis Reza Pérez, presidente do Clúster de Ecommerce Galego.
A formación celebrarase no Café Teatro do Pazo da Cultura os sábados 14 e 21 de novembro, en horario de 16.00 a 20.00 horas. A concelleira de Promoción Económica, Olga Ameneiro, animou os traballadores do comercio a "dar o paso, sen esixencias nin esquemas complicados", asegurando que "o galego suma".
Para participar, os comercios interesados deben escribir a a.pita@naron.gal entre o 9 e o 22 de outubro, indicando o nome e actividade do negocio, así como unha persoa de contacto. Os establecementos poderán identificarse cunha chapa e un adhesivo para sinalizar que atenden en galego.
