O Concello de Narón vén de adxudicar tres obras no pavillón das Lagoas que suman un total de 77.519,23 euros. As actuacións céntranse na reparación da cuberta e da drenaxe exterior, a ampliación do graderío superior e a instalación de liñas de vida na cuberta.
"Con estas tres actuacións damos resposta a un problema que se viña arrastrando no pavillón das Lagoas dende hai tempo, e melloramos as condicións da instalación para quen a usa a diario", sinalou o concelleiro de Deportes, Ibán Santalla.
A maior parte do investimento, 42.961,03 euros, destínase á reparación da cuberta e da drenaxe exterior. Esta intervención, cun prazo de execución de tres meses, busca solucionar as continuas humidades e filtracións que sofre a instalación. Eliminarase o actual canlón interior e colocarase unha nova chapa para conducir a auga directamente ao exterior.
Ademais, actuarase no lado oeste do edificio, onde a cota do terreo provoca filtracións na fachada. Executarase unha nova drenaxe perimetral para evitar que as augas afecten o inmoble.
Complementariamente, adxudicouse a ampliación do graderío superior por 24.243,95 euros e a instalación de liñas de vida na cuberta por 10.314,25 euros, garantindo a seguridade para os traballos de mantemento. Tamén se destinan 4.500 euros á colocación dun novo marcador.
