As obras de remodelación dos Cantóns, un dos proxectos de humanización máis importantes impulsados polo Goberno de Inés Rey, encaran a súa recta final. Esta intervención renovará unha das vías máis emblemáticas da cidade, reordenando o espazo para facilitar o tránsito peonil e potenciar a mobilidade sostible. Os novos Cantóns contan con carrís bici ampliados, repoboación vexetal e a creación de novos espazos verdes, reducindo a superficie de asfalto en 5.000 metros cadrados a favor de espazos peonís con granito e baldosa hidráulica.
Nos últimos días completouse a pavimentación do Cantón Pequeno e o tramo final do carril bici. A alcaldesa, Inés Rey, destacou que "Estamos a darlle unha nova vida aos Cantóns, potenciando o seu carácter peonil e de punto de encontro de toda a cidade".
Nesta fase final tamén se están a executar traballos de pavimentación na praza de Mina, Juana de Vega e Sánchez Bregua, o que completará a calzada. Instalarase a semaforización definitiva, incluíndo un novo xiro á esquerda exclusivo para autobuses. Espérase que Juana de Vega quede aberta nas próximas semanas co novo xiro para autobuses.
Ademais, proximamente procederase á instalación do ascensor do aparcadoiro. Unha vez habilitadas as novas saídas peonís, pecharanse as do Obelisco e fundacións, completando así a pavimentación.
No lado dos xardíns de Méndez Núñez, executaranse remates nas escaleiras e comezará a pavimentación da zona de Entrexardíns. Estes traballos supoñen un avance decisivo para a rehabilitación no corazón da cidade, mellorando o ordenamento da área, o modelo de tránsito, a accesibilidade e a estética da contorna.
A redución de espazos pavimentados con asfalto permite gañar superficie peonil no contorno do Obelisco, o Cantón Grande e o Cantón Pequeno, e proximamente tamén en Entrexardíns. A circulación rodada mantense habilitada con dous carrís (un por sentido) para automóbiles e transporte público, buscando un equilibrio sostible.
A superficie verde nos Cantóns triplicarase, cunha vintena de árbores, unha xardiñeira de cen metros e outros elementos vexetais previstos.
