A directora xeral de Desenvolvemento Pesqueiro, Ángeles V. Suárez, mantivo un encontro con representantes da Confraría de Pescadores de Mugardos para abordar a situación da actividade pesqueira e marisqueira local e analizar as necesidades do sector. Esta xuntanza enmárcase nos contactos continuos da Consellería do Mar coas entidades representativas dos profesionais do mar para avanzar na xestión sostible dos recursos.
O traballo conxunto da Xunta coa confraría de Mugardos materializouse na mobilización de máis de 138.000 euros en axudas entre 2025 e 2026. Estas achegas destináronse á pesca costeira artesanal, á restauración dos recursos mariños e á mellora dos medios de traballo. En concreto, a entidade recibiu 72.120 euros na anualidade de 2025 e outros 36.327 euros en 2026 para proxectos colectivos de xestión sustentable.
Ademais, concedéronse 10.790 euros en 2025 para actuacións de conservación e restauración da biodiversidade e dos ecosistemas mariños. Estas axudas dan continuidade ao traballo desenvolvido desde 2023, cando a entidade recibiu máis de 82.500 euros para proxectos similares, incluíndo a rexeneración do hábitat na enseada do Baño e o reforzo dos bancos mediante sementeira de ameixa babosa.
Outra axuda de 19.178 euros foi destinada en 2025 á mellora da comercialización da ostra rizada e ao mantemento dos bancos marisqueiros. Esta actuación permitiu a adquisición dun remolque multifunción para facilitar o transporte de útiles e produto, optimizando as tarefas extractivas e de mantemento.
O proxecto tamén busca favorecer o aproveitamento da ostra rizada, unha especie foránea, promovendo a súa extracción e valorización comercial mentres se reduce a presión sobre os recursos autóctonos. A mellora dos medios de traballo tamén reforza a conservación e recuperación dos bancos marisqueiros.
A confraría de Mugardos tamén participa en proxectos científicos na ría de Ferrol, como Zamfer, que avalía o estado das poboacións de zamburiña e estuda medidas para a súa conservación e recuperación. Outro proxecto é Bivaferrol, centrado na calidade ambiental dos sedimentos e a súa relación coa capacidade produtiva dos bancos de bivalvos.
