A presentación do evento tivo lugar hoxe no Concello, coa presenza do edil de Deportes, Ibán Santalla, o presidente do Círculo Xadrez Narón, Juan Manuel Caneiro, e a socia e participante María Ángeles Parapar. Santalla destacou o labor do club e o apoio municipal para achegar o xadrez á base.
A competición, válida para o XIX Circuíto Galego de Promoción, está aberta a nenos e nenas das categorías sub-8 "Promesas", sub-10 "Benxamíns", sub-12 "Alevíns" e sub-14 "Infantís". O torneo disputarase baixo o sistema suízo a sete roldas, cun ritmo de 15 minutos máis 3 segundos de incremento por xogada.
A xornada comezará coa presentación e confirmación de listaxes ás 10:30 horas. As roldas de xogo terán lugar entre as 11:00 e as 19:00 horas, e a cerimonia de entrega de premios e clausura está prevista para as 20:00 horas.
Para participar é obrigatorio estar federado na tempada actual. O Círculo Xadrez Narón facilitará a xestión da alta federativa para quen o precise. As inscricións, con prazas limitadas, pecharanse o xoves 17 de setembro a través do formulario en liña, redes sociais do club ou código QR do cartel.
Repartiranse trofeos para os catro primeiros clasificados de cada categoría e locais, ademais de medallas para todos os participantes e un sorteo de agasallos. A asistencia á cerimonia de clausura será necesaria para recoller os premios.
O evento conta coa colaboración da Federación Galega de Xadrez (Fegaxa), Calzados Mara e a Deputación da Coruña.
