A protesta, que tivo lugar na rúa Carmen, comezou ás 19:30 horas e centrouse na situación de dous sindicalistas de Navantia San Fernando, quen, segundo o delegado da CGT en Navantia Ferrol, foron represaliados por "pelexar polas súas condicións económicas e de dereitos" e pola súa participación nas mobilizacións polo convenio do metal en Cádiz.
“"Iso non o perdoa ningunha patronal de auxiliares, ningunha empresa como Navantia e Dragados."
Durante a concentración, fíxose referencia a un audio de 2017, difundido recentemente, no que un representante dunha empresa recoñecía a existencia de "traballadores represaliados" e "listas negras" tanto na industria auxiliar como en grandes empresas. Esta situación foi cualificada como unha "realidade incómoda que existe".
As críticas dirixíronse tamén ao Goberno central, ao que se acusou de manter prácticas que "abren as portas á extrema dereita" ao condenar a traballadores por defender os seus dereitos. O representante sindical lembrou ademais un precedente na comarca de Ferrol, o caso da empresa Nervión, onde o despedimento de 167 traballadores, moitos dos cales non puideron volver traballar no sector naval, demostra que Navantia está "afeita a reprimir".
A CGT anunciou que manterá as mobilizacións en solidariedade cos operarios de Cádiz, mentres se agarda coñecer o alcance de posibles medidas legais contra eles.
