A proba de ultrafondo que organizan o Concello e o Club Deportivo Narón 101 presentouse este luns no Centro de Interpretación dos Museos Industriais de Xuvia (CIMIX). A alcaldesa de Narón, Marián Ferreiro, anunciou que a carreira pechou inscricións con 1.150 participantes, unha cifra que marca un novo récord e supera a do ano pasado.
No acto de presentación tamén estiveron presentes diversas autoridades e representantes institucionais, como Óscar Somorrostro, presidente do Club Deportivo Narón 101; os concelleiros de Deportes e Seguridade Cidadá de Narón, Ibán Santalla e José Oreona; a delegada territorial da Xunta en Ferrol, Martina Aneiros; Carlos Sicre Romero, xefe das Instalacións Deportivas da Armada en Ferrol; os concelleiros de Deportes de Ferrol e Valdoviño, Ricardo Aldrey e Sergio Saavedra; e representantes de Naturgy como Sabela Muñoz e Sara Gil.
A saída e meta da proba situaranse no Paseo marítimo de Xuvia. Os marchadores terán 24 horas para completar o percorrido, mentres que os ciclistas de MTB e e-bike disporán de 12 horas. A saída está programada para o sábado 26 ás 8:30 horas para os ciclistas e ás 9:00 para os marchadores. O venres 25, a véspera da carreira, haberá un concerto de La Indirigible ás 20:00 horas.
Do total de inscritos, o 55% participará como marchador e o resto en bicicleta. Os participantes chegan de toda España, con especial afluencia de Andalucía, Madrid, Asturias e Cataluña, ademais de presenza internacional dende Portugal e Suíza. Paralelamente, o sábado ás 10:00 horas celebrarase a proba 21 Leguas Kids para as idades infantís.
A organización destaca novidades como a obrigatoriedade do GPS para os marchadores nos 101 quilómetros, que inclúe botón SOS e seguimento en directo. Tamén se implementou unha pulseira de peche permanente para identificación e acceso a avituallamentos e meta. No quilómetro 72, os participantes terán dispoñibilidade de comida e cea quentes, e poderán xestionar as súas bolsas de vida. Os ciclistas contarán con taller móbil de Ciclos Roca en dous puntos clave do percorrido.
A alcaldesa Marián Ferreiro subliñou a importancia da colaboración institucional, agradecendo o apoio da Xunta, os concellos de Ferrol e Valdoviño, a Armada e Naturgy, así como o labor das persoas voluntarias. Pola súa banda, Óscar Somorrostro confirmou que todo está listo, pendentes da previsión meteorolóxica, e desexou sorte aos participantes.
A delegada da Xunta en Ferrol, Martina Aneiros, cualificou a proba como "unha proba consolidada, unha referencia na nosa comarca" e destacou o seu valor turístico e o interese que esperta. Os concelleiros de Deportes de Ferrol e Valdoviño, Ricardo Aldrey e Sergio Saavedra, amosaron o compromiso das súas cidades co evento e destacaron o espectacular do percorrido.
Carlos Sicre, en representación do Arsenal Militar, agradeceu a participación da Armada e invitou os participantes a gozar das instalacións e do patrimonio histórico. Sabela Muñoz, de Naturgy, cualificou a proba de "admirable" e destacou a súa convivencia co territorio.
Ao longo do percorrido de 101 quilómetros haberá 12 puntos de avituallamento. Máis de 200 persoas entre persoal sanitario, forzas de seguridade, protección civil e voluntariado velarán polo desenvolvemento da proba, que implicará algunhas restricións de tráfico debidamente sinalizadas.
