A decisión, comunicada en novembro, impide que a coidadora asista ao mozo na transcrición de apuntamentos ou exames cando a profesora de pedagoxía terapéutica (PT) non está presente. Este apoio fora fundamental para o estudante, que se despraza en cadeira de rodas eléctrica e ten dificultades para ler e escribir, dende a súa etapa de Infantil.
Isabel Pazos, nai do estudante, explicou que a dirección do centro non ofreceu explicacións claras sobre a orde. Tras tres meses de espera, a inspectora Carolina García confirmou á familia que a coidadora non podía realizar estas tarefas. A familia argumenta que a función da coidadora é un "apoio á autonomía" e non de ensino, e que esta práctica fora aceptada sen problemas durante toda a traxectoria académica do seu fillo.
“"Eu falei persoalmente con ela, e o que nos dixo é que non, que non podía facer estas tarefas."
A retirada deste apoio chega nun momento crítico, xa que o mozo de 17 anos se prepara para a selectividade (PAU). A situación xera incerteza e un forte impacto emocional no alumno, quen necesita unha persoa de confianza e con coñecemento previo para transcribir os seus exames orais, especialmente en materias como matemáticas.
O obxectivo do estudante é cursar Historia na Universidade de Santiago (USC), un soño que a universidade apoiou facilitando o proceso. A familia solicita unha solución "sinxela e inmediata": que a coidadora poida retomar as súas funcións de transcrición de forma puntual cando a PT non estea dispoñible, xa que a coidadora xa se atopa no instituto e non se requiren novos recursos.
