O acto tivo lugar no centro formativo Irmáns Froilaz, en Narón, e puxo fin a unha iniciativa que contou cun investimento da Consellería de Emprego, Comercio e Emigración de 220.000 euros.
Esta edición do PIE, orientada a mulleres demandantes de emprego con dificultades de acceso ao mercado laboral, superou o seu obxectivo inicial do 35% de inserción laboral, acadando finalmente o 40%.
Durante 12 meses, as participantes recibiron accións de orientación e asesoramento personalizado, formación en diversas áreas, técnicas de motivación, desenvolvemento de habilidades sociolaborais e preparación de entrevistas. Tamén se fomentou o contacto co tecido empresarial e a prospección de oportunidades.
En canto á formación específica, impartíronse seis itinerarios formativos en materia de intelixencia artificial, construción naval, limpeza industrial, cociña, comercio e loxística, e agricultura ecolóxica.
O PIE da Mancomunidade de Concellos da comarca de Ferrol é un dos tres programas financiados polo Goberno galego o pasado curso na área territorial de Ferrol, cun investimento conxunto de 580.000 euros.
