O Partido Popular de Narón sinalou durante o pleno municipal que o goberno de TEGA, co apoio do BNG, aprobou a modificación da ordenanza fiscal da piscina municipal de O Couto sen contar co necesario estudo económico-financiero. O voceiro popular, Germán Castrillón, subliñou que este documento é esencial para coñecer custos básicos como o de mantemento da instalación.
Segundo Castrillón, a ausencia deste informe evidencia a "falta de rigor" do executivo local na xestión dos recursos públicos, é dicir, "o diñeiro de todos os veciños e veciñas".
O representante popular censurou a "irresponsabilidade" de TEGA e do BNG por apoiar unha proposta que, ao seu xuízo, "contraría os principios de transparencia e boa xestión" na administración pública.
Castrillón lembrou que a alegación do seu grupo non cuestionaba a utilidade da piscina, senón que reclamaba "algo tan básico como coñecer previamente canto custará manter aberta esta instalación e con cargo a que partidas orzamentarias se financiarán eses gastos".
Explicou que este requisito está recollido no artigo 25 da Lei Reguladora das Facendas Locais. Non obstante, o informe do expediente realiza unha valoración global das instalacións deportivas, sen un análise específico da nova piscina nin dos seus custos de consumo eléctrico, persoal ou mantemento.
O grupo de goberno de Tega tamén aprobou no pleno ordinario o regulamento de usos do complexo da piscina de O Couto. Ligado a esta nova infraestrutura, o pleno deu luz verde á ordenanza fiscal nº 13, que regula a taxa pola utilización de instalacións deportivas municipais, aprobando de forma definitiva o texto coas tarifas para o uso das diferentes infraestruturas, incluída a piscina de verán ao aire libre.
A entrada diaria terá un custo de 1,50 euros para menores de 14 anos e 3 euros para os maiores. Os abonos mensuais fixaranse en 20 euros para os menores de 14 anos, 25 euros para os maiores e 40 euros para o abono familiar. Ademais, os clubs federados de Narón poderán alugar a instalación por 2,30 euros a hora ou 12 euros ao día.
