Tras un concerto previo celebrado a bordo dunha embarcación na ría, coa actuación de Coke Couto, o festival Nachiños Fest comeza hoxe oficialmente a súa sétima edición no porto de Curuxeiras. A programación oficial terá lugar durante as xornadas deste venres e sábado, con actuacións que comezarán pola tarde e se prolongarán ata ben entrada a madrugada.
Este venres, a partir das 19:30 horas, será a quenda de HYDN, quen dará o pistoletazo de saída. Seguirano Pavlenha, Puño Dragón, Baiuca e Grande Osso, que pechará a noite.
O sábado, Raze será o encargado de iniciar a xornada a partir das 19:30 horas. Ao longo da noite actuarán tamén Eris MacKenzie, The Rapant, La Milagrosa e, como traca final, Flaca.
Como novidade, este sábado celebrarase unha sesión vermú gratuíta e aberta ao público xeral antes das actuacións principais. O grupo Fuah será o encargado de amenizar o mediodía.
Ademais da música, o festival contará cun mercadillo de Filispín Pop Up, con preto dunha ducia de marcas locais, e actividades complementarias como obradoiros e a práctica de pickleball.
As entradas para o festival teñen un custo de 55 euros para o abono xeral de dúas xornadas, ou 33 euros para unha soa xornada, con gastos de xestión incluídos.
