O alcalde das Somozas, Juan Alonso Tembrás, acompañou á delegada da Xunta en Ferrol, Martina Aneiros, na súa visita á instalación de subministración de combustible para vehículos agrícolas. Este proxecto, promovido pola empresa Iván Tembrás SLU, foi beneficiario da última convocatoria de axudas da Intervención Leader, enmarcada no Plan Estratéxico da Política Agraria Común (PEPAC) 2023-2027.
A iniciativa contou cunha achega de 125.554 euros a través dos fondos designados pola Consellería do Medio Rural ao Grupo de Desenvolvemento Rural (GDR) Seitura 22. O proxecto consistiu na execución dunha instalación de subministración de combustible para vehículos propios, situada no exterior da nave da empresa de servizos agrícolas e forestais.
Para a súa posta en marcha, construíuse un depósito con dobre corpo de aceiro e fibra, equipado cun detector de fugas e un surtidor de dúas mangueiras. O equipamento instalouse nunha explanada habilitada entre a nave e o peche da finca, facilitando así a manobra dos vehículos ao redor do surtidor.
A delegada da Xunta destacou a importancia desta iniciativa, sinalando que "vai repercutir positivamente no concello das Somozas e a comarca, estimulando novos proxectos na zona e dinamizando así a economía deste entorno rural, concretamente a parroquia de Recemel, nas Somozas".
