As tres iniciativas, que se desenvolverán entre outubro de 2026 e xuño de 2027, teñen como obxectivo principal eliminar barreiras e abrir camiños cara á autonomía, especialmente para aquelas mulleres que máis o precisan, segundo explicou a concelleira de Igualdade e Benestar Social, María Lorenzo.
O primeiro programa, “AVANZA TIC: Preparación laboral e tecnoloxía”, centrarase en achegar as novas tecnoloxías e ferramentas dixitais de procura de emprego a mulleres en paro, traballando tamén o autocoñecemento e o empoderamento persoal. Impartirase no Centro de Formación Irmás Froilaz e conta con 12 prazas.
A segunda acción, “TI+: Benestar, igualdade e competencias para a vida”, está dirixida a mulleres en situación de especial vulnerabilidade (vítimas de violencia de xénero, responsables de familias monoparentais, maiores de 45 anos sen cualificación, inmigrantes ou de minorías étnicas). Desenvolverase na Casa da Mocidade e traballará destrezas persoais, sanitarias, educativas e de ocio, con 12 prazas por grupo.
O terceiro programa, “Volve á Clase”, ofrecerá formación en alfabetización en español e galego para persoas inmigrantes, preparación de probas de nacionalidade española e de acceso a ciclos formativos. Organizarase en tres grupos na Casa da Mocidade, con 36 prazas en total.
Un 20% das prazas en cada programa resérvanse para derivación do Servizo Sociocomunitario. Poden solicitalas mulleres empadroadas en Narón, de entre 18 e 65 anos. O prazo de inscrición estará aberto ata esgotar prazas, cun asesoramento presencial na Casa da Mocidade de luns a venres de 10:00 a 13:00 horas, entre o 15 e o 30 de setembro.
