O investimento total de 763.956,11 euros, proveniente do Plan provincial de cooperación ás obras e servizos de competencia municipal POS+ADICIONAL 2/2024, destínase a tres proxectos de repavimentación e reforzo de estradas municipais. Segundo fontes do Concello, esta actuación responde ao compromiso de manter en bo estado os viarios, especialmente aqueles de uso máis intensivo.
O primeiro proxecto céntrase nos camiños de Cerdeiras, Capilla da O, Ruxida, Río Seco, Carballal e o camiño do Lodairo. Estas vías rurais, moitas delas procedentes de antigas concentracións parcelarias, recibirán unha nova capa de rodadura con mestura bituminosa en quente tras a regularización dos seus bordos. Esta fase conta cun orzamento de 226.062,33 euros e un prazo de execución de catro meses.
O segundo proxecto aborda a reparación de catro vías: Ferrerías, Corredoira, a rúa San Pedro e a rúa de Soria. Estas estradas sufriron deterioración debido a obras recentes na rede de saneamento. A intervención inclúe regularización de bordos, rebacheo xeral e unha nova capa de rodadura. Na rúa de Soria, ademais, procederase ao fresado e retirada do adoquinado existente. O investimento para esta actuación é de 111.227,31 euros, cun prazo de tres meses.
O terceiro e máis ambicioso proxecto, cunha contía de 426.666,47 euros e catro meses de execución, actuará sobre quince viais en parroquias como Pedroso, Sedes, Castro, O Val, San Xiao, San Mateo e O Couto. Entre os camiños a reforzar atópanse Bazón, Borreiros, Borrallada, Redondo e o camiño das Murallas. Estas vías, orixinalmente pavimentadas con triplo rego asfáltico e con varias reparacións previas, tamén se viron afectadas por obras de saneamento. A intervención inclúe a regularización de bordos e a aplicación dunha nova capa de rodadura.
