A delegada territorial da Xunta en Ferrol, Martina Aneiros, participou esta mañá nunha visita á escavación arqueolóxica que se está a levar a cabo no castro de Esmelle, coñecido como Tralocastro. O xacemento está promovido pola Cátedra de Arqueoloxía e Educación Patrimonial da Universidade da Coruña (UDC) e o Concello de Ferrol, e conta co financiamento da Xunta de Galicia a través da Consellería de Cultura, Lingua e Xuventude.
Durante a visita, guiada polo director da Cátedra, Juan Luis Montero Fenollós, e o investigador do CSIC e director da campaña, Samuel Nión, os asistentes coñeceron os traballos desta cuarta campaña. Nesta edición, que remata este venres 31 de xullo, continúan os achados dos anos anteriores e trabállase en tres novos sectores: dous na zona de acceso e do gran edificio colectivo, e un na croa. Tamén estiveron presentes o director territorial de Cultura, Severino Álvarez, o alcalde de Ferrol, José Manuel Rey, e a vicerreitora do Campus de Ferrol, Ana Ares.
A delegada territorial felicitou aos participantes pola cantidade de materiais recuperados nesta campaña, destacando especialmente as cerámicas e as pedras de muíño. Aneiros puxo en valor a colaboración da Xunta, que busca favorecer os traballos no xacemento e promover o coñecemento público deste valioso lugar. Subliñou tamén a importancia da colaboración entre administracións e os profesionais, estudantes e voluntarios que realizan as tarefas de campo.
