Os oito establecementos de Gadis na cidade de Ferrol están a distribuír bolsas de papel cun deseño único, elaborado por usuarios do centro de día de Aspanaes. Esta acción, que se enmarca no mes de concienciación sobre o autismo, busca poñer en valor a capacidade creativa das persoas con Trastorno do Espectro Autista (TEA) e fomentar a súa inclusión social.
O deseño impreso nas bolsas representa o símbolo do infinito, universalmente recoñecido no contexto do autismo. Esta colaboración entre a empresa e a entidade social ferrolá subliña o compromiso de ambas as partes coa visibilidade e o apoio a este colectivo.
“"Desde Gadis estamos moi felices desta acción conxunta con Aspanaes. O máis importante para nós era que os protagonistas fosen os propios usuarios do centro de Ferrol, que son quen crearon o deseño destas bolsas."
Pagliaro destacou que esta iniciativa non é un feito illado, senón que reflicte a filosofía de traballo da compañía, que anualmente impulsa máis de 2.400 proxectos solidarios, deportivos e culturais vinculados ao ámbito local. Pola súa banda, desde Aspanaes fixeron fincapé na mensaxe de fondo da campaña: a inclusión como práctica cotiá.
Grazas á colaboración con Gadis, damos un paso máis para visibilizar ese potencial e ese dereito a participar en igualdade de condicións. Esta actividade creativa implica dedicación e, sobre todo, oportunidades. Cando facilitamos os apoios adecuados, as persoas con autismo poden participar, crear, achegar e ser protagonistas activos na comunidade na que viven.
Esta acción forma parte do programa de Responsabilidade Social Corporativa de Gadis, que prioriza o apoio a colectivos locais e a promoción da igualdade de oportunidades. Con ela, a empresa busca reforzar tres piares fundamentais: visibilizar a capacidade creativa das persoas con TEA, sensibilizar á cidadanía sobre a importancia da integración plena e fortalecer o vínculo entre a empresa, as entidades sociais e os seus clientes.
