A delegada territorial da Xunta en Ferrol, Martina Aneiros, xunto á directora territorial da Consellería de Sanidade, Cristina Pérez, e o alcalde de Neda, Ángel Alvariño, visitaron hoxe en Neda ás persoas que participaron nunha das actividades grupais deste programa. O programa 'Aloumiños' é unha iniciativa do Sergas en colaboración co Colexio de Educadoras e Educadores Sociais de Galicia.
O obxectivo principal de 'Aloumiños' é combater a soidade non desexada e reforzar o benestar emocional. Para logralo, realízanse andainas saudables, actividades de dinamización social en grupo, charlas e obradoiros centrados no envellecemento activo e no recoñecemento das emocións asociadas á soidade. Estes encontros tamén buscan fomentar as relacións veciñais para procurar o acompañamento.
A delegada Martina Aneiros destacou a importancia dos centros de saúde na detección de persoas que poidan estar a pasar por situacións de soidade non desexada, co fin de achegarlles información e que se beneficien desta iniciativa.
O programa 'Aloumiños' está a desenvolverse en 20 concellos galegos. Na área de influencia da Delegación de Ferrol, ademais de Neda, tamén participan neste proxecto os concellos de As Somozas, Moeche e San Sadurniño.
Este proxecto está aliñado cos obxectivos da Estratexia de Saúde Mental do Sistema Nacional de Saúde e coas accións promovidas pola Subdirección Xeral de Atención á Saúde Mental da Consellería, buscando promover cambios na percepción e actitudes sociais que favorezan a integración e participación das persoas con problemas de saúde mental.
