O Museo CIMIX de Narón abre as súas portas este venres, 18 de setembro, para acoller a exposición "Organismo Vivo (Cartografía dunha conciencia en transformación)", unha proposta do artista SØJĒ POLCÆM. A mostra, que permanecerá aberta ao público ata o 1 de outubro, busca ofrecer un percorrido pola cartografía dunha conciencia en permanente transformación, lonxe dunha retrospectiva tradicional.
A exposición non se centra unicamente nos resultados finais da produción artística, senón que convida a explorar os procesos creativos que a fan posible. Cada obra, poema, imaxe e videopoema intégrase nunha arquitectura en movemento, reflectindo a idea de arte como unha tecnoloxía humana capaz de transformar experiencia en símbolo, memoria en forma e pensamento en imaxe. O espazo expositivo, o antigo muíño, dialoga coa temática central da obra, onde materia, técnica, tempo e transformación están inscritos nos seus muros.
O percorrido artístico reúne pezas de diversos ámbitos creativos como a poesía, a fotografía, a videocreación, a reflexión filosófica e a experimentación visual. A través destas obras, a exposición plantexa preguntas fundamentais sobre a condición humana, a construción da identidade e o papel da arte na era da aceleración tecnolóxica, sen ofrecer respostas pechadas senón un mapa aberto para a viaxe do visitante.
SØJĒ POLCÆM, nado en Ferrol en 1966, desenvolveu unha traxectoria vital e profesional diversa. Iniciou a súa andaina laboral como carpinteiro de dique e gradas na antiga Bazán (hoxe Navantia), onde tamén tivo unha destacada traxectoria sindical. Paralelamente, cultivou a filosofía e a poesía de forma autodidacta. Adoptou o nome artístico SØJĒ POLCÆM en 2022 e puxo en marcha o proxecto dixital "O Mundo Segundo SØJĒ POLCÆM". A súa primeira exposición tivo lugar en 2024 na galería DGD de Mallorca, e posteriormente unha obra súa foi incluída nun catálogo de Magna Art Auctions xunto a recoñecidos mestres como Velázquez, Goya, Picasso e Dalí.
O acto de inauguración terá lugar este venres, 18 de setembro, ás 12:00 horas. Contará coa presenza do artista, da concelleira de Turismo, Natalia Hermida, e da profesora de filosofía Belén Castellanos.
