A recoñecida cantante belga Kate Ryan, unha das grandes figuras da música dance dos anos 2000, será a cabeza de cartel do Dabuten Remember Festival, que se celebrará o sábado 26 de setembro no recinto de concertos da rúa Progreso, no Porriño. O festival, de entrada gratuíta, promete un repaso polos éxitos da artista, incluíndo versións de clásicos europeos e temas como Désenchantée, Ella, elle l’a, Voyage Voyage e Je t’adore, coa que representou a Bélxica en Eurovisión en 2006.
A organización destaca que a presenza de Ryan é unha aposta por un espectáculo de primeiro nivel, deseñado para evocar a nostalxia musical dos anos 90 e principios do século XXI. O festival busca consolidarse como un punto de encontro interxeracional, atraendo tanto á veciñanza como a visitantes da comarca da Louriña e do sur da provincia.
Antes da chegada de Kate Ryan, as Festas do Cristo continúan esta fin de semana cunha programación variada. O domingo 20 de setembro, a artista Uxía presentará o seu espectáculo Será por flores na praza Arquitecto Antonio Palacios. O xoves 17 de setembro, ás 19:00 horas, haberá unha proposta familiar de narración oral, maxia e humor titulada Hamelin, de Fran Rei, dirixida a público a partir de 3 anos.
O sábado 19 de setembro celebrarase o Día do Peregrino e do Turista, con actividades especiais na praza Arquitecto Antonio Palacios. Pola tarde, ás 20:00 horas, a mesma praza acollerá o concerto de Rafael Yebra & Oswaldo Oro, unha fusión de saxofón e guitarra con pezas de jazz, clásica, contemporánea, pop e rock.
O domingo 20 de setembro, ás 19:00 horas, Uxía ofrecerá o seu concerto Será por flores, celebrando catro décadas de traxectoria musical. A artista galega, baixo a dirección musical de Pablo Novoa, revisitará os piares da súa carreira e as súas raíces.
O alcalde do Porriño, Alejandro Lorenzo, subliñou a variedade de propostas para todas as idades e o prestixio de contar con Uxía nestas festas.
A programación complétase con actividades deportivas como a presentación do Club Ximnasia Rítmica Porriño o venres, o Atios Cup e o Torneo de Tenis o sábado, e a IV Carreira de Empresas Galicia – XV Interrunning o domingo, de carácter solidario.
