A formación nacionalista sinala que a situación actual, marcada por avarías frecuentes, máis de cen cancelacións en poucos meses e a falta de información, afecta gravemente á conectividade das comarcas de Ferrolterra e Ortegal, agravando o illamento territorial.
O BNG advirte de que a inseguridade do servizo é xa "estrutural", con avarías frecuentes e cancelacións case a diario. Denuncian que isto provoca unha total falta de alternativas para as persoas usuarias, que ven minguada a súa mobilidade.
Ante este escenario, o deputado nacionalista esixe ao Goberno central a execución de investimentos urxentes para a modernización da infraestrutura, a renovación do material rodante e o reforzo do persoal de atención ao público.
A solución definitiva a longo prazo pasa por un cambio de modelo: a transferencia da liña entre Ferrol e Ribadeo á Xunta de Galicia.
Rego lembra que outras comunidades autónomas como Euskadi, Cataluña e Andalucía xa obtiveron resultados moi positivos ao xestionar liñas semellantes da antiga rede de FEVE a través de operadores públicos propios, o que se traduciu nun aumento de usuarios e nunha mellora da calidade do servizo.
