A intervención céntrase no tramo que conecta coa Alianza Aresana, onde se está a renovar o pavimento e as canalizacións. O proxecto conta cun financiamento compartido entre a Deputación da Coruña, a través do Plan POS+2025, e as arcas municipais.

Entre as melloras técnicas destaca a substitución da rede de saneamento, que presentaba deficiencias, e a instalación dun sistema separativo para a recollida de pluviais. Así mesmo, o alumeado público actualizarase con tecnoloxía LED para garantir unha maior eficiencia enerxética.

Un dos eixes centrais da obra é a transformación da praza do Pozo. O deseño prevé a eliminación de barreiras entre a beirarrúa e a calzada mediante o uso de formigón coloreado, creando unha área de preferencia peonil que favoreza a convivencia e a seguridade viaria.

Dende a concellería responsable sinalan que esta actuación segue a liña doutras intervencións xa executadas no casco urbano, como as realizadas nas rúas Fomento, dos Anxos ou San Xosé, co obxectivo de facer o espazo público máis accesible para a veciñanza.