Dende o pasado luns estanse a rexistrar exemplares de carabelas portuguesas nas praias de Ferrol. Como medida de precaución, o Concello de Ferrol izou unha bandeira específica de cor lila, con dúas medusas en morado intenso, nos postos de socorrismo de dúas praias: Ponzos e Santa Comba.
Estas mesmas praias xa recolleran varios exemplares o luns, ao igual que A Frouxeira en Valdoviño. A Physalia physalis, aínda que non é unha medusa senón un sifonóforo, ten unha picadura igualmente dolorosa.
O consistorio informou que se dotou de bandeiras a todas as casetas de socorrismo, aínda que a presenza destes organismos é, por agora, escasa.
