O xoves 19 de novembro terá lugar un acto no Concello de Cedeira onde os integrantes de Ondiñas na Vila presentarán un manifesto colectivo e exhibirán pancartas elaboradas por eles mesmos, reflectindo as súas preocupacións sobre dereitos como a vivenda, a saúde, a alimentación, a educación, o xogo, a identidade e a protección fronte á explotación infantil.
A xornada incluirá o descubrimento dunha placa na praza do Concello que identifica a Cedeira como Cidade Amiga da Infancia, recoñecemento outorgado por UNICEF España no ano 2025. Esta distinción subliña o compromiso municipal coa promoción dos dereitos da infancia e a súa participación activa na vida local, materializado no traballo do CLIA.
A celebración coincide coa véspera do Día Mundial da Infancia, o 20 de novembro, aniversario da aprobación da Convención sobre os Dereitos do Neno pola ONU en 1989. Ese mesmo día, unha representación de Ondiñas na Vila participará nunha actividade no Parlamento de Galicia.
O alumnado do grupo de Secundaria do IES Punta Candieira traballou sobre o tema «Coidado da contorna e futuro sostible», enfocándose no dereito á infancia a medrar en ambientes saudables e na protección do planeta para as xeracións futuras.




