O Fogar do Maior de Caldas de Reis celebrou o seu primeiro aniversario plenamente consolidado como un referente para as persoas maiores do municipio. O centro, situado no Camiño Sarnadela, 5, non só acolle máis de 20 actividades semanais nas que participan preto de 400 usuarios, senón que tamén funciona como un espazo de socialización e interacción.
O alcalde, Jacobo Pérez, destacou a importancia da sala común, aberta de luns a venres de 10:00 a 14:00 e de 16:00 a 20:00 horas, e os fins de semana de 17:30 a 20:30 (18:30 a 21:30 no verán). Este espazo permite aos veciños atoparse, consultar a prensa, xogar a xogos de mesa, facer pasatempos ou ver a televisión, co obxectivo de combater o illamento, especialmente durante os meses máis fríos.
Inaugurado o 8 de novembro de 2025, o Fogar do Maior, con 900 metros cadrados, respondeu a unha demanda histórica e permitiu ampliar a oferta da Concellería de Benestar Social e Maiores. Segundo o alcalde, o 100% dos usuarios participan en máis dunha actividade, e o 75% en tres ou máis.
As actividades máis populares son Ximnasia de Mantemento, Pilates e Natación Terapéutica, seguidas de Novas Tecnoloxías e Obradoiros de Estimulación Cognitiva. Tamén se organizan obradoiros temáticos, charlas informativas e andainas.




