O proxecto «Cedeira – Mar de vida» busca fomentar hábitos de vida saudables desde idades temperás a través de sesións formativas, propostas de actividade física e rutas polo territorio.
A iniciativa subliña a importancia dun estilo de vida activo e unha alimentación equilibrada, combinando coñecementos sobre nutrición co exercicio físico e a valorización dos produtos locais.
A programación comezou o luns con sesións sobre actividade física e deporte, impartidas por Isidro Alonso, graduado en ciencias da actividade física e o deporte e dono do centro de adestramento local IB, quen achegou alternativas para manterse activo e reducir o sedentarismo.
Os días martes e mércores, Alicia Villegas, nutricionista e profesional do Racing de Ferrol, impartirá xornadas sobre alimentación saudable, a importancia dunha dieta equilibrada e o valor dos produtos frescos, locais e de tempada.
O xoves e o venres, o alumnado participará en rutas polo territorio que combinarán exercicio físico, contacto coa contorna e posta en valor dos recursos locais.
Estas rutas incluirán unha visita ao restaurante local Badulaque, onde Manuel Ramonde, rexente do local, amosará o traballo diario arredor dos produtos de proximidade e as técnicas de preparación axeitadas.
O proxecto, impulsado polo Concello de Cedeira co financiamento do Fondo Europeo Marítimo, de Pesca e de Acuicultura (FEMPA) e a Consellería do Mar, a través das axudas xestionadas polo GALP A Mariña-Ortegal, pretende contribuír a que as novas xeracións incorporen hábitos beneficiosos para o seu desenvolvemento.
