A ruta, de dificultade baixa e cun desnivel de 100 metros, partiu ás 9:00 horas da Praza da Igrexa de Ares e pasou por puntos de interese como a Punta do Castelo, as calas de Estacas e A Barrosa, o miradoiro do Blue Star e o Castro de Santa Mariña, ata chegar á Cova dos Mouros. O regreso realizouse polo interior, completando o percorrido arredor das 13:00 horas. Un total de 25 persoas participaron nesta xornada.
Como novidade, nesta saída e nas seguintes polo municipio de Ares, permitiuse a participación de mascotas acompañando as súas propietarias, sempre baixo o seu control e co correspondente seguro de responsabilidade civil.
O SendAres continúa así promovendo os hábitos de vida activa e achegando o sendeirismo á veciñanza, combinando o exercicio físico co descubrimento do patrimonio natural e paisaxístico da vila.




