O acto, celebrado en Caamouco, congregou a unha ampla representación do tecido social e veciñal da contorna, coa participación de diversas asociacións locais como a Asociación Veciñal de Caamouco, a Asociación Cultural CaamoucoNET, o Club Marítimo de Redes, o Club de Tenis Redes, a Comisión de Festas Redes-Caamouco, a Comunidade de Augas de Redes e a Asociación Veciñal de Limodre.
Na representación municipal, asistiron o alcalde do Concello de Ares, Julio Iglesias, e a concelleira de Cultura, Alma Barrón, quen acompañaron aos colectivos e á veciñanza nesta data sinalada.
Durante a cerimonia desenvolvéronse varios actos conmemorativos: unha lembranza histórica do impacto do Ciclón de 1926 en Caamouco, a plantación simbólica de flores entre as entidades e o descubrimento dunha placa conmemorativa.
O encontro tamén incluíu un minuto de silencio en memoria das vítimas, pechado con doce toques de campá, e a interpretación dos himnos de Cuba e Galicia como peche solemne.
Foi un encontro cargado de respecto, memoria e recoñecemento, organizado pola Agrupación Instrutiva de Caamouco.
