O orzamento, aprobado en sesión plenaria, busca o equilibrio entre ingresos e gastos para o funcionamento dos servizos municipais, a atención ás persoas e as actuacións en infraestruturas. A alcaldesa, Marisol Morandeira, destacou que as contas recollen os recursos necesarios para atender o funcionamento do Concello e dar cobertura aos servizos, tendo en conta as necesidades da veciñanza e as características do municipio, incluíndo o incremento dos custos de servizos e subministracións.
Morandeira tamén sinalou a importancia de manter a prestación directa de servizos municipais con persoal propio e a necesidade de atender ás persoas maiores e colectivos que precisan apoio, dada a dispersión xeográfica de Guitiriz. A alcaldesa fixo fincapé na necesidade de que os servizos sociais poidan dar resposta ás necesidades da veciñanza en todo o territorio municipal.
No apartado de investimentos, destacan a renovación do colector paralelo á vía do ferrocarril (111.449,36 euros), a mellora do acceso a Cabana e A Raposeira (86.669,55 euros) e unha achega de 75.000 euros para as obras do Centro de Atención a Persoas Maiores.
As operacións correntes ascenden a 5.841.808 euros (94,22% do total), cun capítulo de persoal de 3.148.708 euros (50,78%). Este peso responde á prestación directa de servizos sociais, limpeza, mantemento de vías e xestión de infraestruturas, co obxectivo de garantir a continuidade e calidade. Os gastos en bens correntes e servizos sitúanse en 2.564.500 euros, cun incremento motivado pola actualización de prezos de subministracións e tarifas de empresas externas.
O orzamento mantén o foco na atención social e ás persoas maiores, con recursos para subvencións, axudas de emerxencia, bolsas de formación, apoio ao transporte e programas como Xantar na Casa. Tamén se prevé un fondo de continxencia de 20.000 euros.
