A conselleira do Mar, Marta Villaverde, participou hoxe no CEIP A Lomba de Vilagarcía de Arousa nunha xornada do programa Mexillón de Galicia nas aulas. A iniciativa, impulsada polo Consello Regulador da DOP Mexillón de Galicia en colaboración coa Xunta, busca achegar aos máis novos o valor nutricional deste produto e fomentar hábitos de alimentación saudables.
Acompañada polo secretario xeral do Consello Regulador, Joaquín Garrido, a conselleira participou en actividades didácticas co alumnado de segundo, terceiro e cuarto de primaria. As sesións centráronse nas propiedades alimentarias do mexillón, o seu proceso de cultivo nas rías galegas e a importancia económica e social da mexilloeira en Galicia.
A programación incluíu unha charla para preto de 100 escolares e unha visita á cociña do centro, onde o alumnado puido coñecer a preparación do produto e degustar un menú elaborado con Mexillón de Galicia e arroz. A actividade busca achegar a realidade da acuicultura galega a través da alimentación e a gastronomía.
“"É importante familiarizar as novas xeracións cos produtos do noso mar e favorecer o seu coñecemento desde idades temperás. A comunidade educativa ten un papel clave para promover unha alimentación variada e equilibrada, e transmitir a relevancia dun sector ligado á economía, á cultura e á identidade das zonas costeiras galegas."
Esta iniciativa forma parte dun programa piloto que prevé chegar a uns 15 centros educativos galegos ao longo deste ano. O obxectivo é mellorar o coñecemento das características nutricionais do mexillón, promover o seu consumo e dar visibilidade ao traballo dos profesionais do sector.
