O Concello de Ares abriu o proceso de selección para atopar persoas que queiran formar parte como figuración na rodaxe dunha película. A xornada de gravación está prevista para o vindeiro 3 de novembro.
Os requisitos para participar inclúen ter dispoñibilidade de xornada completa e non ter participado previamente na película CHAPAPOTE. Recoméndase deixar medrar o pelo para adaptarse á ambientación do ano 2002, evitando peiteados demasiado actuais.
A remuneración establecida é de 59 € brutos por xornada, cunha alta no Réxime de Artistas por 8 horas. As horas adicionais serán aboadas como extra. O desprazamento ata o punto de rodaxe corre por conta propia.
O Concello sinala que cubrir o formulario de inscrición é parte do proceso de selección e non garante a participación final. As persoas seleccionadas serán notificadas directamente por WhatsApp.
