O Concello de Silleda conseguiu unha importante achega de 150.456,69 euros do Ministerio para a Transición Ecolóxica e o Reto Demográfico para o seu proxecto “Silleda Co-labora: comunidade de emprendemento rural”. Esta iniciativa foi unha das 189 seleccionadas a nivel estatal entre máis de 1.200 solicitudes e destaca por ser un dos oito proxectos promovidos directamente por concellos galegos que reciben financiamento.
O investimento global da actuación ascende a 167.500,33 euros, dos cales a achega estatal supón a maior parte e o Concello asumirá o resto con recursos municipais. A alcaldesa, Paula Fernández, subliñou o éxito da convocatoria, cualificándoo como un “respaldo importante a unha idea na que levamos tempo traballando e que ten como obxectivo crear novas oportunidades para emprender e traballar no rural”.
“Silleda Co-labora” busca crear un ecosistema de emprendemento rural baseado na dixitalización, o apoio á produción local e a mellora da promoción e comercialización. A iniciativa amplía estratexias previas, como a reforma do Centro Social de Ponte, e incorporará actuacións no Viveiro de Empresas Área 33 e no centro de produtores de Cira.
Os espazos de Área 33 e Cira transformaranse en “smart buildings”, conectados por unha plataforma dixital común para xestionar postos, salas, consumos e uso das instalacións. Ademais, mellorarán a conectividade e incorporarán sistemas intelixentes. Habilitaranse 12 postos de coworking para emprendedores e profesionais, formando parte dunha rede de servizos para facilitar a posta en marcha e consolidación de proxectos.
En Cira, prepararanse espazos para tarefas como o envasado e etiquetado de produtos locais, con equipamento específico e melloras de accesibilidade e eficiencia enerxética, incluída a instalación de placas solares. O proxecto tamén creará unha marca local propia, un distintivo de calidade, orixe e sustentabilidade, e habilitará un espazo promocional na plataforma dixital para dar visibilidade aos participantes.
Paula Fernández engadiu que “non se trata só de rehabilitar ou equipar locais. Trátase de que eses espazos teñan actividade, que sexan útiles e que axuden a xerar economía e oportunidades no noso rural”. O proxecto tamén pon especial atención á mocidade, ao emprendemento feminino e á produción local.
