Na quenda de mañá, correspondente a técnico de farmacia, logopedista e condutor, acudiron 1.545 persoas das 1.961 inscritas. O conselleiro estivo acompañado pola secretaria xeral técnica do departamento, Natalia Lobato, e a directora xeral de Recursos Humanos do Sergas, Mar Pousa.
En concreto, o 79,1% dos convocados para técnico de farmacia (1.007 de 1.273), o 91,3% dos logopedistas (200 de 219) e o 72% dos condutores (338 de 469) realizaron o exame. As prazas ofertadas nestas categorías son 38, 5 e 15, respectivamente.
Gómez Caamaño sinalou que reforzar os equipos e avanzar na estabilidade laboral mellora a atención aos pacientes e o desenvolvemento de novos programas asistenciais. Engadiu que estes exames, sumados aos de abril e maio, permitirán realizar este ano probas para 4.699 prazas de persoal estatutario.
As probas continuarán esta tarde (16:00 horas) para fisioterapeuta, técnico superior en imaxe para o diagnóstico, fontaneiro e técnico especialista en sistemas e tecnoloxías da información, con 2.572 persoas admitidas. Mañá domingo, 25 de outubro, completaranse os exames para técnico en coidados auxiliares de enfermería e técnico de farmacia (quenda de discapacidade intelectual), con 9.561 aspirantes admitidos. Os procesos selectivos do Sergas continuarán en novembro.
