O Concello da Coruña vén de formalizar definitivamente o proxecto de reparcelación da propiedade denominada Acuartelamento da Grela ou Cuartel de Automóbiles e o acordo para a liquidación do convenio asinado co Ministerio de Defensa. Isto permitirá dispoñer deste espazo, que leva sen uso moitos anos, para levar a cabo unha intervención que traerá novos equipamentos públicos a unha zona clave de acceso e saída da cidade.
A alcaldesa, Inés Rey, sinalou que "Este é un gran paso para o establecemento dunhas dependencias que serán clave para facilitar e mellorar a loxística do transporte urbano con vistas ao novo contrato que se licitará proximamente". O Concello considera este enclave de grande utilidade e prevé urbanizalo.
O proxecto de reparcelación contempla que o Concello dispoña de algo máis da metade deste soar, case 22.000 metros cadrados da superficie total, cunha edificabilidade duns 38.000 metros cadrados. O uso desta superficie permitirá contar non só con espazo para cocheiras, senón tamén albergar outros servizos públicos que poidan resultar necesarios.
A proposta tamén establece a extinción do convenio por mutuo acordo das partes e determina as regras para a súa liquidación, coa finalidade de concretar as obrigas e os compromisos asumidos, executados, pendentes ou extinguidos por cada un dos axentes implicados. O espazo gañado pasará a ser de titularidade municipal e, polas súas dimensións, permitirá no futuro albergar outros servizos máis alá do uso como cocheiras para o transporte público.
