As actuacións comezaron nas parroquias de Taboada e Cortegada, concretamente nas pistas de zahorra que comunican os lugares da Ponte e Carballeda, e nas pistas de Liñares, Do Río e Valiños. Prevese continuar nos vindeiros días no lugar de Reboredo, na parroquia de Taboada. As intervencións inclúen o acondicionamento e nivelación do firme, así como a apertura e limpeza de cunetas para facilitar a circulación e mellorar o acceso a vivendas, propiedades e explotacións agrogandeiras.
Xa se realizaron traballos na parroquia de Cortegada, no lugar de Xubín, onde se acondicionaron os accesos á fonte, e actualmente interveñen no lugar de Covas, na mesma localidade, mellorando os accesos a unha vivenda. A maquinaria continuará nos vindeiros días con novas actuacións previstas en distintos puntos do municipio.
Unha novidade destacada desta quenda é o reforzo dos equipos da Mancomunidade con medios propios do Concello de Silleda. Súmanse unha pala e dous tractores municipais, ademais do persoal do Concello, para aproveitar ao máximo a presenza da maquinaria comarcal e avanzar no maior número de actuacións. Esta coordinación permite incrementar a capacidade de traballo e axilizar as intervencións nun municipio con ampla dispersión territorial e unha extensa rede de camiños rurais.
“"Nun concello como o noso, con tantas parroquias, núcleos de poboación e quilómetros de pistas, o mantemento da rede viaria rural é un traballo constante. Por iso queremos aproveitar ao máximo os recursos da Mancomunidade, reforzándoos cos nosos propios medios para poder actuar en máis puntos e dar resposta ás necesidades da veciñanza."
A rexedora lembra que estas intervencións complementan os investimentos do Concello na mellora das infraestruturas viarias do rural, destacando a importancia tanto das grandes obras de pavimentación como das actuacións de mantemento para conservar os camiños e garantir os accesos.
