O proxecto, que se desenvolverá na parroquia de Artoño, contempla a instalación de dez domos desmontables e tres cabanas fixas para aloxamento. Ademais das unidades habitacionais, o complexo incluirá unha sauna, unha terma exterior e unha zona de estacionamento para os visitantes.
A resolución ambiental, que será publicada no Diario Oficial de Galicia, establece que a viabilidade da iniciativa depende do cumprimento estrito de medidas de protección da atmosfera, a saúde, as augas e o patrimonio cultural. O promotor deberá garantir a correcta xestión de residuos e a integración paisaxística das instalacións.
Este informe é un paso previo necesario, pero non supón a autorización definitiva para o inicio das obras. A sociedade promotora deberá tramitar agora o resto de licenzas e permisos sectoriais esixidos pola normativa vixente ante a Axencia de Turismo de Galicia.
