O proxecto, que se centrará na primeira fase entre os puntos quilométricos 3+600 e 6+100, busca solucionar os problemas de deficiente xeometría e dificultade de tránsito que presenta a vía actual, cuxo ancho é inferior aos catro metros e cun trazado sinuoso.
Esta actuación é fundamental xa que a DP-5002 é a principal vía de acceso a núcleos como O Pumariño, A Picheira, As Eiras, O Torno, O Peteiro e A Aira Vella, ademais de servir como acceso sur ao Parque Natural das Fragas do Eume.
O orzamento total, sumando as expropiacións necesarias (17.420,22 euros), ascende a 1.080.291,06 euros. A intervención dotará á calzada dun ancho de seis metros con beiravías pavimentadas, mellorará a visibilidade, renovará a drenaxe e a sinalización, e incluirá o desvío dun tramo dunha liña eléctrica afectada.
Os traballos terán un prazo de execución de dez meses. Durante as obras, minimaranse os cortes de tráfico e garantirase a circulación diaria, ao ser o único acceso aos núcleos habitados da zona.
