A mobilización coincide coa celebración dun pleno extraordinario no Concello de Teo, que terá como único punto na orde do día a discusión sobre o proxecto do centro xestor de valorización de residuos non perigosos en Cacheiras. A sesión está prevista para as 20.00 horas no consistorio da Ramallosa.
Durante o pleno, Silvia Rama, presidenta da plataforma, intervirá para expor as preocupacións da veciñanza. Subliñará os riscos que suporía a instalación desta planta, especialmente pola súa proximidade a vivendas, algunhas a menos de 50 metros, e o impacto negativo que tería na calidade de vida dos residentes en zonas como Feros e A Torre, debido ao aumento de ruído e po.
A veciñanza solicita ao pleno que se faga todo o posible para impedir unha actividade que aumentará o ruído e o po na zona.
A plataforma insta aos representantes políticos locais a tomar todas as medidas necesarias para evitar a execución deste proxecto, que consideran prexudicial para o medio ambiente e o benestar dos habitantes de Cacheiras. Espérase unha participación significativa de veciños afectados e solidarios na concentración.
