O SD Compostela xa se atopa en modo playoff. Tras non conseguir o ascenso directo, o conxunto branquiazul afrontará o camiño longo para regresar á Segunda Federación. O técnico Secho Martínez sinalou a necesidade de pasar páxina rapidamente e converter a decepción da última xornada nunha nova oportunidade.
"Non debemos perder tempo. Despois de Viveiro, vin ao equipo dialogando de forma positiva e para nós o playoff, evidentemente, é unha oportunidade", manifestou o adestrador sonense. Asegurou percibir unha reacción positiva na plantilla, consciente da dificultade do formato: "Sabemos que é un camiño difícil pero somos coñecedores do formato competitivo ao que nos enfrontamos".
O preparador definiu a fase de ascenso como "un torneo curto a dobre eliminatoria" e recalcou que o obxectivo principal segue sendo o mesmo: "ser campións". No que respecta ao estado físico, confirmou que a maioría de xogadores estarán dispoñibles para o partido de ida contra o Racing Villalbés, coas novidades de Zubanovic e Riki Mangana, que regresan tras lesión, e de Pablo Crespo, que volve tras sanción.
Sobre o rival, Martínez recoñeceu que espera un Racing Villalbés "experimentado e competitivo", capaz de defender con paciencia e con pasado en partidos de ascenso. O conxunto chairego, ao que o Compos non puido vencer esta tempada, xa logrou ascender en 2023 e disputou a primeira rolda do playoff o ano pasado.
"Xúntanse moito, acumulan moitos xogadores por detrás do balón en determinados momentos e vanos demandar moita calma para atopar os camiños", analizou o técnico, quen tamén eloxiou o talento individual do rival, mencionando a futbolistas como Pablo Trigo, Javi Rey, Make ou José Varela.
O equipo de Juan Rodríguez destaca pola súa solidez defensiva, sendo a segunda menos goleada da liga. Un estilo que busca controlar o ritmo do encontro e que xa desquiciou ao Compos no último precedente. Ante isto, Secho insistiu na importancia de "ter a cabeza fría" e centrarse no que poden controlar, xa que as interrupcións son función do árbitro.
"Hai que saber competir. O importante é saber o que temos que facer, coñecer as súas fortalezas, ter claro como imos querer minimizalas e atopar as súas debilidades. E como lle escoitei dicir ao seu adestrador, temos que atopar o maior número de veces aos nosos xogadores de ataque", comentou.
Por primeira vez esta tempada, o Compostela afronta unha eliminatoria a dobre partido. Aínda que o duelo de ida centra a atención, o adestrador lembrou que "non só vale con gañar mañá porque aínda quedaría a volta". "Evidentemente imos tratar de buscar o mellor resultado posible, pero sendo conscientes de que isto vai de eliminar ao teu rival en 180 minutos", detallou, aínda que o seu equipo buscará ser ambicioso dende o principio.
Finalmente, Secho referiuse á vantaxe competitiva de acabar en segundo posto, que outorga o factor campo na volta e a clasificación en caso de igualada. "É unha vantaxe porque o rival ten que gañarnos, pero o noso pensamento non pode ser ese. Equivocaríamonos se pensamos así. Nós temos que intentar sacar o mellor resultado posible este sábado e iso pasa por buscar a vitoria", concluíu.
