O Goberno central declarou a emerxencia para a contratación das obras, subministros e servizos necesarios para a reparación e substitución dos elementos afectados polas chamas na comisaría de Santiago.

Mentres duren os traballos, a Policía Nacional disporá dunha sede provisional no barrio de Santa Marta, concretamente nun local da rúa Feliciano Barrera. Este espazo, que abrirá nas próximas xornadas, xa conta con mobiliario e despachos, e apenas require adaptación. Sitúase nun punto estratéxico entre esta zona, Volta do Castro e preto do aparcadoiro disuasorio do hospital Clínico.

A elección de Santa Marta como emprazamento provisional non pasou desapercibida para os veciños, nun barrio que experimentou un aumento das queixas por problemas de seguridade vinculados ao menudeo de droga nos últimos meses.

O incendio na Comisaría de Santiago produciuse o pasado 12 de febreiro, pouco despois das dez da mañá, na galería de tiro do edificio, situada na planta -4. O suceso obrigou a desaloxar tanto a Comisaría como o instituto Rosalía de Castro e o Rectorado da Universidade de Santiago. As chamas xeraron unha gran columna de fume negro visible desde varios puntos da cidade e os labores de extinción prolongáronse durante case sete horas.