Esta iniciativa, presentada polo presidente Valentín González Formoso, busca fomentar a igualdade de oportunidades e a formación da mocidade da provincia. O obxectivo principal é que a experiencia de estudar no estranxeiro, tradicionalmente máis accesible para os residentes en grandes cidades, chegue tamén aos mozos e mozas que viven en vilas pequenas ou no rural.
“"Estes programas eran ata agora unha oportunidade case exclusiva das grandes cidades, e o noso obxectivo é que tamén poidan aprender inglés en Irlanda as mozas e mozos que vivan nunha pequena vila ou no rural. Pretendemos que teña as mesmas oportunidades un rapaz que nace no Ensanche de Santiago que un nace no porto do Barqueiro."
A selección dos participantes priorizará a situación económica das familias e o rendemento académico do alumnado. Segundo explicou González Formoso, o programa está deseñado para apoiar a aqueles que, a pesar de ter interese e capacidade, non dispoñen dos recursos económicos para financiar unha estancia deste tipo.
“"O que máis imos puntuar son as familias con ingresos máis baixos. Os que hoxe xa poden financiar cos recursos familiares unha estancia así xa o poden facer, pero o valor deste programa é precisamente darlle a oportunidade a aqueles que queren, que valen, pero que non poden por unha cuestión económica. Aí é onde queremos facer fincapé."
Os estudantes seleccionados recibirán un curso intensivo de inglés de polo menos 15 horas semanais durante a súa estancia en Irlanda. Ademais, antes da viaxe, realizarán un curso preparatorio en liña de 10 horas para facilitar a súa adaptación á experiencia internacional. As solicitudes pódense presentar a través da plataforma SUBTEL da sede electrónica provincial entre o 9 e o 23 de abril.
