O CPI San Tomé do Carballo, que hoxe conta cuns 160 alumnos dende Infantil ata Secundaria, conmemorou os seus 55 anos de historia cunha xuntanza que puxo en valor a importancia do centro para o concello. A orla de exalumnos sería inmensa se se tivese en conta a toda a xente que pasou polas súas aulas dende a súa fundación na década de 1970, cando chegou a ter 600 estudantes.
Entre os asistentes atopábase un veciño de Taboada de 91 anos que participou na inauguración dun dos edificios do recinto. O exconselleiro de Educación, Víctor Manuel Vázquez Portomeñe, agradeceu a invitación e cualificou a creación do colexio como "un fito trascendente da historia de Taboada", destacando que "a educación é un dos compoñentes máis decisivos da persoa humana, a riqueza que ninguén lle poderá arrebatar".
O edil municipal de educación, Alexandre Varela, dirixiu o acto, que comezou coa intervención da autora local Ana Vila, quen agradeceu aos seus profesores e recitou un poema en honra á escola. Tamén interviron o exdirector José Jesús Ramos Ledo, quen lembrou que no centro se impartiu Lingua Galega un ano antes de ser obrigatorio, e o actual xefe de estudos, Manuel Fafián, quen destacou aos nenos como "os verdadeiros protagonistas".
A presidenta da asociación de nais e pais (Anpa), Carmen Fernández Ledo, expresou a súa satisfacción por contar "cunha escola pública, próxima e humana" e chamou a afrontar "xuntos os novos retos que se nos presentan: tecnolóxicos, emocionais e nutricionais". Tres alumnas, Martina, Xiana e Daniela, pronunciaron palabras moi aplaudidas sobre o significado do colexio para elas.
O acto pechouse coa intervención de Alexandre Varela, quen animou a "contribuír á integración de moitos rapaces nados noutros países que estudan neste CPI". Tras os discursos, os asistentes gozaron dunha exposición de fotografías antigas do centro, pinchos e música en directo.
