A programación arrincou coa música na Praza de Catro Camiños a partir das 22:00h, co concerto recuperado do grupo monfortino Malenne e a actuación da banda de pop rock Los Limones.
O venres, 21 de agosto, a xornada estará protagonizada polo II “Ata o Chan Festival” na Praza do Pavillón Municipal, desde as 23:30h, coa presenza de recoñecidos nomes da música electrónica como José de las Heras, Pawly, Dumore, Carlos López e Marcos Magán. A entrada será libre, con control de acceso para garantir a seguridade.
O sábado, 22 de agosto, celebrarase unha das citas máis emblemáticas, o Folión de Carros, Festa de Interese Turístico Galego e Ben de Interese Cultural. O desfile comezará ás 23:00h, tras a actuación da Banda de Gaitas do Concello de Chantada. Nesta edición participarán 13 carros, organizados pola Asociación Amigos do Folión coa colaboración do Concello.
Posteriormente, na Praza de Galicia, terá lugar a lectura do pregón das Festas a cargo do escritor D. Xosé Miranda Ruíz, especialista en mitoloxía popular e literatura de transmisión oral. A noite musical será amenizada pola orquestra Tango na Praza de Santa Ana a partir da 1:00h.
O domingo, 23 de agosto, o protagonismo será para o XXXV Certame de Bandas de Música na Praza do Cantón (18:00h), coas actuacións da Banda de Música de Chantada, a Banda de Música de Muimenta e a Banda de Música de San Cibrao das Viñas. As verbenas nocturnas correrán a cargo da orquestra París de Noia en Xoán XXIII e Los Satélites na Praza de Santa Ana.
A xornada do luns, 24 de agosto, estará dedicada á programación infantil no Parque Eloísa Rivadulla (desde as 17:00h) con xogos tradicionais e inchables. Pola noite, actuarán o Grupo Top Líder e o Combo Dominicano. A medianoche, ás 00:00h, haberá unha sesión de Fogos Artificiais desde a Praza do Pavillón Municipal.
O martes, 25 de agosto, festivo local, pecharanse as festas coa tradicional Festa da Empanada no campo do San Lucas. A celebración contará coa ambientación musical de “Os Barrios” e as charangas “Unión Phenosa”, “Louband” e “Fanfarria Furruxa”. Non se autorizará o uso de equipos de música particulares.
Para facilitar o acceso á Festa da Empanada, haberá servizo de autobuses permanente entre as 11:30h e as 21:00h entre a Praza de Santa Ana e o lugar de celebración, cun custo de 3€ por viaxe. O Concello anima a usar este servizo e a evitar permanecer no campo tras o remate do mesmo.
Os concertos nocturnos do último día serán da Orquestra Funçao Publika en Xoán XXIII e a Orquestra Charleston Big Band na Praza de Santa Ana.
O alcalde de Chantada, Manuel Lorenzo Varela, anima á veciñanza e visitantes a participar nas actividades, destacando a importancia de celebrar as tradicións, a paisaxe, a historia e a cultura local, así como a gastronomía e o viño da comarca.
