As obras de acondicionamento da contorna da igrexa parroquial de Santa Cristina de Campaña en Valga xa están en marcha. A concelleira Carmen Gómez visitou a zona para supervisar o proxecto, que busca mellorar a accesibilidade e poñer en valor o patrimonio local deste templo románico do século XII.
A actuación céntrase na humanización dos terreos adxacentes á igrexa e á casa reitoral. Retirarase o actual firme asfáltico para substituílo por un novo pavimento de pedra. Tamén se actuará no tramo da estrada municipal fronte ao templo, aplicando formigón desactivado.
O proxecto inclúe a colocación de novo mobiliario urbano, traballos de xardinaría e sinalización específica para dar prioridade peonil á área. Prevese tamén a instalación de canalizacións para o futuro soterramento das liñas aéreas de servizos.
Esta iniciativa de recuperación patrimonial é posible grazas a un convenio de colaboración entre o Concello e a Xunta de Galicia, cunha achega de 153.520 euros.
A Igrexa de Santa Cristina, que data do século XII, destaca pola súa nave única, o seu arco triunfal e a portada románica orixinal. A sancristía é unha construción posterior e o campanario, unha torre exenta de planta cuadrangular erixida a finais do século XX. No interior, sobresaen as pinturas murais da cabeceira, datadas no século XVI e restauradas en 2014.
