O rexedor e a concelleira acompañaron aos técnicos da Consellería nunha visita ao centro educativo para abordar as deficiencias detectadas nos tellados que provocan as filtracións de auga.
Os responsables municipais sinalaron tras a visita que "temos o compromiso da Consellería de reparar de urxencia as canalizacións e desaugadoiros dos tellados onde teñen orixe estes problemas". Engadiron que dende o momento en que tiveron coñecemento da situación, puxéronse en contacto coa Xunta e os técnicos desprazáronse ao centro.
Ademais destas actuacións urxentes, agárdase que no próximo ano a Xunta execute o proxecto principal pendente, que inclúe a rehabilitación de fachadas e outras obras para resolver as deficiencias que se arrastran dende a remodelación integral do colexio. Esta demanda realízase dende hai anos e espérase que se faga realidade.
