Con 96 anos, Carmen González Iglesias, 'A Zapateira', representa a memoria viva de Pontecesures. A súa vida estivo ligada á transmisión do baile e da música tradicional galega, formando a centos de nenas e nenos, mulleres e homes que pasaron pola súa agrupación. A través dela, preservou, creou e transmitiu letras, rimas e cantos tradicionais, mantendo vivo un legado que pasou de xeración en xeración.
O vindeiro 7 de novembro ás 18:00 horas, a proxección do documental que leva o seu nome, pretende render homenaxe a Carmen e, ao mesmo tempo, visibilizar o papel fundamental das nosas maiores como transmisoras do coñecemento, educadoras e depositarias da memoria colectiva.
Este recoñecemento celebra anos de dedicación e compromiso coa cultura popular, á vez que serve de oportunidade para reflexionar sobre a igualdade e o valor dos traballos que, durante moito tempo, permaneceran invisibilizados. Preservar a nosa memoria é tamén recoñecer a quen fixo posible que chegase ata nós.
O evento terá lugar no Salón de Plenos do Concello de Pontecesures.
