O Concello de Valga, en colaboración coa Secretaría Xeral da Lingua da Xunta a través do seu Servizo de Normalización Lingüística, puxo en marcha unha iniciativa formativa para a introdución á lingua e á cultura galegas. O curso, de carácter gratuíto, está deseñado para persoas maiores de 16 anos que procedan de fóra de Galicia e desexen iniciarse no idioma ou mellorar as súas competencias básicas.
O principal obxectivo desta proposta é fomentar a integración sociocultural dos participantes, axudándoos a superar posibles barreiras culturais. Durante as sesións impartiranse nocións fundamentais de lingua galega, con énfase na fonética e pronuncia, así como vocabulario esencial, expresións cotiás e a construción de frases sinxelas para situacións da vida diaria. Ademais, o curso achegará aos asistentes á historia, tradicións, música, gastronomía e festividades galegas.
A formación será impartida pola técnica do Servizo de Normalización Lingüística de Valga. A avaliación será continua e, unha vez superado o curso, os alumnos recibirán un diploma oficial expedido pola Secretaría Xeral da Lingua.
O prazo de inscrición permanecerá aberto ata o vindeiro 29 de xullo. O curso desenvolverase durante os meses de setembro e outubro, cun horario aínda por concretar cos participantes. Hai un máximo de 20 prazas dispoñibles e a iniciativa terá unha duración total de 20 horas, repartidas en 10 sesións. Dende o Concello subliñan que non se requiren coñecementos previos de galego, xa que o nivel adaptarase ao dos asistentes.
