O suceso tivo lugar arredor das 14:00 horas no quilómetro 93 da N-550, nas proximidades de Carracedo. Tras recibir o aviso, o 112 Galicia mobilizou á Garda Civil de Tráfico, Policía Local, Bombeiros de Vilagarcía, efectivos de Protección Civil e persoal de mantemento da vía.

Os servizos de emerxencias confirmaron no lugar que catro vehículos estiveran implicados no sinistro e que dúas persoas precisaron ser trasladadas para recibir atención médica no Hospital Domínguez de Pontevedra.

Ademais, o 112 Galicia rexistrou outro incidente en Ponteareas, onde un turismo envorcou preto da igrexa de Cristiñade, no lugar do Outeiro. O propio condutor alertou ás 17:00 horas, indicando que non podía saír do vehículo, aínda que non presentaba feridas graves.

Para este segundo accidente, desprazáronse efectivos do GES, Bombeiros de Ponteareas, Garda Civil de Tráfico, Policía Local, Agrupación de Voluntarios de Protección Civil e Bombeiros de Vigo. A persoa foi rescatada polo maleteiro e atendida polo Servizo de Urxencias Sanitarias de Galicia-061, sen que as súas lesións revestisen gravidade.