A visita permitiu ao alumnado asistir a varias vistas xudiciais e coñecer de preto o funcionamento da xustiza, as persoas que nela participan, a súa terminoloxía e os diferentes tipos de procesos. Aínda que non se requiriu a intervención de intérpretes, a experiencia foi valiosa para familiarizarse co contexto e os procedementos deste ámbito profesional, crucial para a súa formación.
A catedrática do Departamento de Tradución e Lingüística da UVigo, Maribel del Pozo, destacou a importancia desta inmersión para o estudantado, xa que a interpretación xudicial é unha parte fundamental da súa carreira. O Grao en Tradución e Interpretación ofrece materias específicas para preparar aos alumnos nas saídas profesionais da tradución e interpretación xurídica.
Esta actividade enmárcase no programa 'Educar en Xustiza', unha iniciativa impulsada polo Consejo General del Poder Judicial (CGPJ) e organizada pola Oficina de Comunicación do Tribunal Superior de Xustiza de Galicia (TSXG). O obxectivo deste programa é achegar o funcionamento da administración de xustiza ao alumnado de diferentes niveis educativos a través da asistencia a xuízos reais.




